Nafarroako Ikastolen jaiak mugarri berria izanen du 2026ko urriaren 18an. San Fermin Ikastolak (Zizur Nagusia) eta Erentzun Ikastolak (Viana) oinezko bide berbera urratuko dute Zizur Nagusia eta Galar arteko lurretan. "Bidean bat gara" leloak adierazten duen moduan, bi hezkuntza-komunitateren arteko batasuna eta euskararen hedapena izanen dira jaien ardatzak.
Nafarroa Oinez ez da egun bakarreko ospakizuna; urte osoan zehar garatzen den egitasmo sozial, kultural eta ekologiko zabala baizik. Testuinguru horretan, oinarrizko lan-ildoa da festak ingurumenean uzten duen aztarna leuntzea eta Nafarroako natur-ondarea aberastea. Horregatik, San Fermin eta Erentzun ikastolen jaien esparruan kokatzen da Oinez Klima 2026 proiektua, jaiaren ingurumen-konpromisoa ekintza zehatz bilakatuz.
Jurramendiko prebentzio-jarduketa: 22.000 m² baso-suteen aurka
Nafarroa Oinezen eragin positibo honen adibide nagusia Jurramendiko Paisaia Bereziaren ipar-mendebaldeko magalean gauzatuko da, "Jurramendi" izeneko 67. Fazeriak hartzen dituen lurretan. Lur hauen jabetza Azketa eta Urbiolako Kontzejuei eta Villamayor de Monjardingo Udalari dagokie.
2022ko baso-sute suntsitzaileen ondoren, suteen prebentziorako gizarte-kontzientzia piztu zen. Horri erantzunez, Oinez Klima 2026k erregai karga txikiko lur-zerrenda sortuko du Jurramendin, guztira 22.000 m²-ko azalera hartuz. Eremu hau bereziki zaurgarria da klima mediterraneoagatik, udako uzta-bilketako arriskuagatik, herriguneekiko gertutasunagatik eta orografiagatik. Gainera, bertatik Donejakue Bidea igarotzen denez, sute-arriskuak gora egiten du.
Esku-hartzearen bidez, sastrakadi trinkoaren geruza kenduko da erregaiaren jarraitutasuna eteteko, baina sakabanatutako arteak eta Alepo pinudiak mantendu egingo dira.
Oinez Basoatik Oinez Klimara: 18 urteko konpromiso pedagogiko eta ekologikoa
Oinez Klima ez da bakandutako ekimena, 2008an jaiotako ibilbide emankor baten jarraipena baizik. Nafarroa Oinezek ingurumenean duen eragina gutxitzeko sortu zen Oinez Basoa. 18 urteko historian, Nafarroan zehar 14 baso landatu dira (Arbizu, Tafalla, Tutera, Zangoza, Baztan, Lesaka, Altsasu, Arguedas, Estellerria eta Atarrabia), 52.000 zuhaitz baino gehiagorekin 60 hektareatan.
Zuhaitz landaketatik haratago, basook ingurumen-hezkuntzarako baliabide pedagogiko bihurtu dira NUPekin egindako ikerketa-akordioei esker. Aipagarria da Paz de Ziganda Ikastolako ikasleek Arbizun egindako azterketa, Espainiako Lurzoru Zientzia Elkartearen lehen saria lortu zuena. 2025ean, proiektuak Oinez Klima izena hartu zuen, tokiko landaketatik klima-aldaketari aurre egiteko ikuspegi integralera igaroz.
Euskara eta ingurumena: Etorkizunerako ere bidean bat gara
San Fermin eta Erentzun ikastolek antolatutako Nafarroa Oinezek argi uzten du gizarte arduratsu batek bere bi herentzia nagusiak zaintzeko betebeharra duela: euskara eta ingurune naturala. Zizur Nagusia eta Galar artean ospatuko den Urriaren 18ko festak bi ardatz hauek uztartuko ditu, "Bidean bat gara" lelopean.
Egun, klima-aldaketari aurre egitea premiazko zeregina den heinean, euskararen erabilera sendotzea ere ezinbesteko konpromisoa da ikastolen komunitatearentzat. Bi fronte hauetan eragiteko gizarte-erantzunkizuna eta erakundeen zein enpresen elkarlana giltzarri dira, bidean bat egiteko.
_20191009131205Log.jpg)
