23/01/2025 | Lizarra Ikastola

Entzumenaren atea zabaltzen: haurren estimulazio neuroauditiboa
Ikasleek ikaskuntza-prozesu orekatu eta arrakastatsua izateko, entzumen osasuntsua izatea funtsezkoa da. Lizarra Ikastolan badakigu entzumenaren kalitatea zuzenean hizkuntza-garapenarekin, arreta-gaitasunarekin eta kontzentrazioarekin lotuta dagoela. Horregatik, azken 12 urteotan, Sena izeneko estimulazio neuroauditiboaren programa aitzindaria erabiltzen eta aplikatzen aritu gara; 4 urteko ume guztien entzumenaren kalitatea bermatzeko.

Programa honek, entrenamendu zehatz baten bidez, entzumenaren kalitatea hobetzea du helburu. Estimulazio neuroauditiboak entzumen-organoaren optimizazioa bilatzen du, barne-belarrian dauden ‘zilio zelulak’ —entzumen-mezuak garunera bidaltzen dituzten zelula mikroskopikoak— berrabiatuz eta optimizatuz. Horrela, entzumen-prozesuan akats txikiak dituzten haurrek hobekuntzak nabaritzen dituzte, eta entzumen ona dutenek beren gaitasunak sendotzen dituzte.

Prozesua oso metodikoa da, eta behar bezala garatzeko belarriak une osasuntsuan egon behar du. Lau ikasleko talde txikitan, haurrek 10 egunez musika klasikoko piezak entzuten dituzte kalitate handiko kasko batzuekin. Musikarekin batera, ipuin bat kontatzen zaie, ahots argi eta lasai batek gidatuta. Lehenengo ipuina Printze txikia izaten da, eta hortik aurrera, ipuin ezberdinak entzuten dituzte. Audioetan, musika atseginarekin batera, entzumena estimulatzen duen efektua lortzeko, soinu frekuentzia desberdinko uhin-soinuak modu jakin batean eraldatzen dira programa informatiko baten bitartez.

Programa honetan parte hartzen duten umeek 45 minutuko saioak egiten dituzte egunero, bi astez. Lehen astean bost saio egiten dira, bi eguneko atsedenarekin; eta beste bost bigarren astean. Horrek entzumen-organoa modu progresibo eta eraginkorrean lantzeko aukera ematen du.

Entzumen arazo txikiek ondorio handiak izan ditzakete haurraren ikaskuntzan. Otitis errepikakorrak, mukiak edo denboran izandako bestelako entzumen arazoek entzumen-mezuak behar bezala transmititzea eragotz dezakete. Haur batek entzumen zailtasunak baditu; hitzen ahoskera, arreta edo kontzentrazioa kaltetuta egon daitezke. Programa honekin entzumen mezuen transmisioa hobetzen da, eta horrek ikaskuntza-prozesu osoan eragiten du.

Familiek espresuki uko egiten ez badute, estimulazio programa hau haur guztiei egiten zaie, entzumen-egoera edo aurrekari medikuak edozein direla ere.

Estimulazio neuroauditiboak uhin-soinuek dituzten ezaugarriak erabiltzen ditu, entzumenaren anatomia eta fisiologia kontuan hartuz. Belarri barruko koklean dauden zilio zelulak, ‘ahulduta’ edo ‘makurtuta’ egon daitezke, entzumen-mezuak transmititzeko zailtasunak sortuz. Programa honen bidez, musikaren uhin-soinuen eta frekuentzien bitartez, zelula horiek ‘zutitzea’ bilatzen da; entzumen-mezuak garunera azkarrago eta garbiago iristeko. Honek ez du inolako kalterik eragiten; aitzitik, entzumen-gaitasunak egonkortu edo hobetu egiten dira, haurraren entzumen-egoera kontuan hartuta. Belarri osasuntsu batean ez da aldaketa nabarmenik nabarituko, baina entzumen-arazo txikiren bat dagoenean, emaitzak ikusgarriak izan daitezke.

Lizarra Ikastolak dagoeneko hamarkada bat baino gehiagoko esperientzia du programa hau praktikan jartzen. Pandemia garaian ume batzuk estimulazioa egiteko aukera galdu zuten; eta hurrengo urtean, ahalegin bereziak egin ziren estimulazio saioak atzeratu zituzten haurrek, zailtasunak zituztenek gutxienez, saio horiek berreskuratzeko. Egun, programa hau ikastolaren bereizgarrietako bat bihurtu da. Gure hezkuntza-eredua integrala izatea nahi dugu, haurraren garapen kognitibo, sozial eta fisikoa modu orekatua lantzen duena. Entzumena zaintzeak, ikaskuntza hobetzeaz gain, ongizate orokorra ere bermatzen du.

Familiek programarekiko duten erantzuna oso positiboa izan da urteetan zehar. Askotan esaten digute haurrek hobeto ahoskatzen dituztela hitzak edo arreta hobea dutela saioak egin ondoren. Programa honek, gainera, familiekiko komunikazioa indartzen du; entzumenari buruzko kontzientzia sortuz eta umeen garapen osoan eragiten duten faktoreei buruzko informazioa emanez.
Lizarra Ikastolan argi daukagu: entzumenaren zaintza ez da soilik osasun kontua, hezkuntza kontua ere bada. Gure konpromisoa gure ikasle guztiei ahalik eta hezkuntza-esperientziarik onena eskaintzea da, eta entzumenaren estimulazioan oinarritutako programak haurren garapen integralean eragitea laguntzen digu.

 Ver documento


Volver

Nuestras ikastolas

Síguenos en Facebook

Síguenos en Twitter